Sebije Neloviç, një emigrante shqiptare dhe punëtore pastrimi në ndërtesën luksoze 345 Park Avenue në Nju Jork, ka shpëtuar për mrekulli nga një sulm me armë zjarri që ndodhi të hënën e kaluar, ku mbetën të vrarë katër persona, përfshirë edhe vetë autorin.

Ngjarja ndodhi në orët e mbrëmjes, kur një person i armatosur hyri në hollin e ndërtesës dhe hapi zjarr mbi disa punonjës, duke vrarë tre prej tyre. Më pas, agresori u ngjit në katin e 33-të, ku në atë moment po punonte Sebije Neloviç.

Autoritetet amerikane raportuan se sulmuesi, i cili ishte i pajisur me armë automatike, nuk kishte ndonjë shënjestër të caktuar në atë kat, por dyshohet se kishte si objektiv selinë e Ligës Kombëtare të Futbollit Amerikan (NFL), e vendosur po në të njëjtën godinë. Hetimet treguan se ai kishte marrë ashensorin e gabuar. Në xhepin e tij u gjet një letër ku pretendohej se vuante nga CTE, një sëmundje që lidhet me traumën cerebrale, e shpeshtë tek sportistët profesionistë të futbollit amerikan.

Neloviç, 65 vjeç, arriti të shpëtojë duke u strehuar në një dollap të shërbimeve në korridorin e katit të 33-të. Ajo qëndroi e fshehur për më shumë se dy orë derisa forcat e policisë e gjetën dhe e nxorën të sigurt. Sulmuesi kishte kryer vetëvrasje pak minuta pas sulmit.

Pas ngjarjes, Sebije u shpreh se ishte thellësisht e tronditur dhe se trauma po e shoqëronte çdo ditë. Ajo mësoi më pas se kolegia e saj, Julia Hyman, 27 vjeç, e cila punonte po në atë kat, ishte një nga viktimat e sulmit.

Prej vitit 1998, Sebije Neloviç ka punuar pa ndërprerje në këtë ndërtesë dhe kishte ndjerë gjithmonë siguri në vendin e punës. Ngjarja tragjike ka tronditur komunitetin dhe ka ngritur sërish shqetësime për sigurinë në ambientet e punës në Shtetet e Bashkuara.