Mbi 20,000 shqiptaro-amerikanë tashmë janë regjistruar për të votuar në zgjedhjet e 11 majit 2025 në Shqipëri, duke shënuar një moment historik për diasporën. Sipas të dhënave më të fundit, Shtetet e Bashkuara renditen të katërtat ndër vendet me numrin më të lartë të votuesve të regjistruar nga jashtë, me 20,653 persona të regjistruar, që përbëjnë 8.4% të totalit të regjistrimeve. Kjo është një hap i rëndësishëm për t’u siguruar që shqiptarët jashtë vendit të kenë një zë në të ardhmen e Shqipërisë.
Tani që regjistrimi ka përfunduar, të gjithë ata që u regjistruan me sukses do të marrin së shpejti fletën e votimit dhe udhëzimet përkatëse nga Komisioni Qendror i Zgjedhjeve (KQZ) në adresën që kanë deklaruar. Votimi do të bëhet me postë, dhe të gjitha kostot postare do të mbulohen nga KQZ.
Pasi të marrin fletën e votimit, votuesit duhet ta plotësojnë atë sipas udhëzimeve të KQZ-së, duke zgjedhur partinë politike dhe/ose kandidatin e preferuar. Fleta e votimit duhet të dërgohet me postë përsëri në KQZ, duke u siguruar që të mbërrijë jo më vonë se ora 19:00 e datës 11 maj 2025.
