Presidenti Joe Biden i Shteteve të Bashkuara ka dërguar një telegram urimi shefes së shtetit të Kosovës, Vjosa Osmani, në rast të 16-vjetorit të pavarësisë.
Në letër, Biden shkroi se SHBA vazhdon të mbështesë dialogun e ndërmjetësuar nga BE për të arritur një marrëveshje gjithëpërfshirëse të normalizimit me Serbinë – që ai e quan “një hap të rëndësishëm drejt njohjes së ndërsjellë”.
Presidenti i Shteteve të Bashkuara inkurajoi lidershipin e Kosovës që të përmbushë të gjitha obligimet e saj, përfshirë të gjitha marrëveshjet e kaluara të arritura përmes këtij procesi.
“Në vitin e ardhshëm, pres me padurim që të vazhdojmë të punojmë së bashku për të ndërtuar rritje ekonomike të përfshirë, për të përforcuar institucionet demokratike dhe për të përparuar shtetin e së drejtës. Gjithashtu pres me padurim bashkëpunimin tonë të vazhdueshëm në fushën e sigurisë dhe përpjekjet e përbashkëta për të përparuar reforma të nevojshme për të arritur në fund objektivin e Kosovës, integrimin në BE. Dhe bashkë, do të vazhdojmë të ngrihemi për lirinë – duke përfshirë qëndrimin së bashku me Ukrainën kundër agresionit brutal të Rusisë,” thuhet në letër të plotë nga Joe Biden, e ndarë nga Presidenca kosovare me mediat më 16.02.2024.
