Shijet e mrekullueshme të kuzhinës shqiptare dhe amerikane u ndërthurën së bashku, teksa kuzhinierja e ftuar amerikane Tiffany Derry përgatiti një darkë së bashku me kuzhinierët shqiptarë Sokol Prenga, Gëzim Musliaka dhe Armond Kikino, njoftoi Ambasada e SHBA.

Ambasadorja e Shteteve të Bashkuara të Amerikës, Yuri Kim iu bashkua shefave të kuzhinës, pronarëve të agrobiznesit dhe mbështetësve të ushqimit dhe verës shqiptare për të shijuar darkën dhe për të diskutuar se si ushqimi mund të fuqizojë komunitetet.

Tiffany është në Shqipëri këtë javë për të ndarë përvojat e saja si shefe kuzhine, aktiviste dhe sipërmarrëse dhe si pjesë e festimit tonë përgjatë gjithë vitit të 100-vjetorit të marrëdhënieve diplomatike midis Shteteve të Bashkuara dhe Shqipërisë.