Komuniteti shqiptar i Miçiganit festoi me disa manifestime këtë jubile të 110-vjetorit të Pavarësisë së Shqipërisë.

Të shtunën e 26 nëntorit në sallën e kishës së Shën Palit dhe më 27 nëntor në sallën “Nënë Tereza” e Zojës së Shqiptarëve qindra shqiptarë festuan së bashku Festën e Flamurit.

Ndër të ftuarit dhe këngëtarët specialë ishin grupet e vallëzimit të fëmijëve dhe të rinjve, të veshur me rroba tradicionale e bënë atmosferën vërtet të këndshme! Të dy grupet e valltarëve të “Gjergj Kastrioti” dhe grupi i valltarëve të Zojës së Shqiptarëve, nën drejtimin dhe mësimet e koreografit të talentuar shqiptar Joli Agolli sollën një larmi kërcimesh nga vise të ndryshme të Shqipërisë.

“Ishte një gëzim kaq i madh për komunitetin që pamë kaq shumë të rinj dhe fëmijë që duan të vishen dhe të kërcejnë nën tingujt e muzikës së bukur shqiptare!” – thotë Rita Gjelaj, e cila ishte e pranishme aty.

Albana Gojçaj, talenti më i ri i këtij komuniteti rrëmbeu zemrat e të ftuarve me performancën e saj. Ajo këndoi këngën “Jam Albana” nga Malsia, e veshur me një xhubletë të bukur dhe duke kërcyer.