Astronomja shqiptare nga Kosova, Pranvera Hyseni, po nis një mision prestigjioz me mbështetje nga NASA dhe Universiteti i Kalifornisë. Më 13 shkurt, ajo njoftoi se do të udhëtojë drejt mesit të Oqeanit Paqësor për të operuar një teleskop 4-metërsh në një lartësi prej 4,000 metrash mbi nivelin e detit. Ajo do të analizojë asteroidët dhe të mbledhë të dhëna të rëndësishme për të kuptuar më mirë Sistemin Diellor.
“Ky udhëtim, i financuar nga NASA dhe Universiteti i Kalifornisë, është realizimi i një ëndrre që e kam ndjekur për vite me radhë. Pas shumë përkushtimi, kërkimesh shkencore dhe netëve të gjata të kaluara mbi libra, më në fund erdhi koha të përballem me këtë sfidë” shkroi ajo në njoftimin e saj të parë.
Më 17 shkurt, në Ditën e Pavarësisë së Kosovës, Hyseni ndau një mesazh emocionues duke shprehur krenarinë e saj për përfaqësimin e vendit në një moment kaq të rëndësishëm.
“Ndihem jashtëzakonisht krenare që po përfaqësoj Kosovën në Ditën e Pavarësisë në një nga samitet më të fuqishme të observatorëve në botë në mesin e Paqësorit, me mbështetje financiare nga NASA. Gëzuar Ditën e Pavarësisë! 🇽🇰 Le të festojmë me krenari dhe ta çojmë Kosovën gjithnjë e më lart” shkroi ajo në Facebook.
