Kancelari gjerman Olaf Scholz u ka thënë udhëheqësve të gjashtë vendeve ballkanike që aspirojnë të anëtarësohen në Bashkimin Evropian se “është koha për të kapërcyer konfliktet rajonale” dhe për të qëndruar së bashku ndërsa Rusia po bën luftë në Ukrainë.

Scholz dhe zyrtarët e lartë të BE-së – Ursula von der Leyen dhe Charles Michel – iu bashkuan udhëheqësve nga Serbia, Kosova, Bosnja dhe Hercegovina, Mali i Zi, Maqedonia e Veriut dhe Shqipëria të enjten për Samitin e Ballkanit Perëndimor në Berlin.

Duke iu drejtuar takimit, ai tha se gjashtë vendet “i përkasin pjesës së lirë dhe demokratike të Evropës” dhe theksoi nevojën për të përmbushur dëshirën e tyre të kahershme për t’u bashkuar me BE-në, të cilën ai e përshkroi si në “interesin” e bllokut.

Stabiliteti dhe prosperiteti i rajonit tuaj nuk mund të shkëputet nga stabiliteti dhe prosperiteti i Evropës në tërësi”, tha Scholz.

Palët pritet të nënshkruajnë marrëveshje për lehtësimin e aranzhimeve rajonale të udhëtimit dhe njohjen reciproke të kualifikimeve akademike në samit. Ata pritet të diskutojnë edhe për çështjet e energjisë.

Por, me rritjen e tensionit mes Serbisë dhe Kosovës këtë javë, Scholz tha se vetë kombet duhet të kapërcejnë problemet që kanë ngadalësuar rrugën e tyre drejt BE-së dhe vuri në dukje “një ndjenjë urgjence”.