Maqedonia e Veriut ka vendosur të dëbojë pesë diplomatë të Rusisë nga vendi. Kjo është bërë e ditur nga Ministria e Jashtme. Qeveria e Shkupit njoftoi ambasadorin rus në Maqedoni të Veriut, Sergei Bazhnikin, lidhur me vendimin.
“Sipas informacioneve të marra nga organet kompetente, diplomatët rusë kanë kryer aktivitete që janë në kundërshtim me Konventën e Vjenës për Marrëdhënie Diplomatike dhe do të duhet të largohen nga territori i Republikës së Maqedonisë së Veriut brenda pesë ditëve të ardhshme”, thuhet në njoftimin e Ministrisë së Jashtme të Maqedonisë së Veriut.
Nuk është hera e parë që Shkupi merr një vendim të tillë, pasi edhe vitin e kaluar shpalli “persona non grata” dy diplomat rusë, si masë reciproke ndaj dëbimit të dy diplomatëve të saj nga Moska.
