Qeveria e Kosovës ka shtyrë zbatimin e rregullave të reja që do t’i detyronin njerëzit në zonat me shumicë etnike serbe të ndërrojnë targat e tyre të makinave të lëshuara nga Serbia me ato të Kosovës.

Rregullat do të hynin në fuqi në mesnatën e së hënës.

Por të dielën serbët etnikë në veri bllokuan rrugët dhe njerëz të armatosur qëlluan me armë në shenjë proteste.

Zbatimi i rregullave është shtyrë për një muaj pas konsultimeve me SHBA-në dhe BE-në.

Vendimi i qeverisë së Kosovës për të vendosur rregulla të reja, duke përfshirë zëvendësimin e targave serbe me ato kosovare, çoi në përplasje.

NATO e përshkroi situatën si “të tensionuar” pasi qindra serbë etnikë parkuan kamionë, cisterna dhe automjete të tjera pranë dy pikave kryesore kufitare me Serbinë në shenjë proteste ndaj rregullave të reja, duke detyruar policinë të mbyllë dy vendkalimet.
Misioni i udhëhequr nga aleanca në Kosovë, Kfor, tha se ishte i përgatitur të ndërhynte “nëse rrezikohet stabiliteti”.

Pati raportime edhe për të shtëna nga njerëz të armatosur, megjithëse policia e Kosovës tha se nuk kishte marrë raporte për ndonjë të lënduar.

Rritja e tensioneve çoi në konsultime me ambasadorët e SHBA dhe BE.
Ambasadori amerikan Jeffrey Hovenier tha se i kërkoi qeverisë së Kosovës që të shtyjë zbatimin e vendimit të targave për 30 ditë “sepse duket se ka pasur keqinformim dhe keqkuptim rreth vendimit”.

Kosova më pas ra dakord të shtyjë rregullat e reja për 30 ditë.