Dr. Luan Jaha, specialist në kirurgjinë vaskulare, është nderuar me titullin e prestigjioz Fellow në American College of Surgeons (ACS) gjatë një ceremonie zyrtare të mbajtur në San Francisko, SHBA.
Lajmin e ka ndarë vetë Dr. Jaha përmes një postimi në Facebook, ku ka shprehur mirënjohjen e tij për këtë arritje të rëndësishme në karrierën e tij profesionale dhe akademike. Ceremonia u zhvillua në kuadër të Kongresit Klinik të ACS, një ngjarje e madhe në fushën e kirurgjisë.
Në mesazhin e tij të sinqertë, Dr. Jaha ka falënderuar mësuesit, kolegët dhe miqtë për mbështetjen e tyre të vazhdueshme, duke shprehur mirënjohje të thellë për udhëzimet e tyre. Gjithashtu, ai veçoi familjen e tij—bashkëshorten Vlora dhe fëmijët Jona dhe Arti—të cilët e kanë frymëzuar dhe mbështetur në çdo hap të jetës së tij.