Në një moment të rëndësishëm për praninë dixhitale të Kosovës, Amazon ka njohur zyrtarisht Republikën e Kosovës, duke e përfshirë atë në të gjitha platformat e saj. Ky zhvillim pason takimet e nivelit të lartë në tetor ndërmjet Presidentes Vjosa Osmani dhe përfaqësuesve të Amazon në Washington D.C.

Kjo arritje është pjesë e përpjekjeve të vazhdueshme të Task Forcës për Diplomacinë Dixhitale, një iniciativë e Odës Ekonomike Amerikane në Kosovë, e mbështetur nga Ambasada e SHBA-ve në Prishtinë. Me përfshirjen e Kosovës në Amazon, individët dhe bizneset vendase tani mund të zgjerojnë shtrirjen e tyre, duke prezantuar produktet vendore para një audience globale në Amazon.com. Ky avancim pritet të nxisë rritjen ekonomike dhe inovacionin, duke lehtësuar qasjen pa pengesa për konsumatorët në një nga platformat më të mëdha të tregtisë elektronike në botë, si dhe në shërbime si Amazon Web Services (AWS) dhe Amazon Alexa.