Organizata Botërore e Shëndetësisë paralajmëron se sistemi shëndetësor në Ukrainën lindore është shembur, duke vënë në rrezik jetën e mijëra njerëzve të bllokuar në Mariupol dhe zona të tjera të rrethuara.

Zyrtarët shëndetësorë të OKB-së thonë se është kritike që atyre t’u jepet akses i menjëhershëm në Mariupol dhe zona të tjera më të goditura nga luftimet në Ukrainën lindore. Ata thonë se kanë marrë raporte se pothuajse të gjitha objektet shëndetësore dhe spitalet në zona si rajoni i Luhanskut ose janë dëmtuar ose shkatërruar.

OBSH po apelon për akses në zonat e prekura për të vlerësuar nevojat shëndetësore dhe për të ofruar furnizime kritike mjekësore për të sëmurët dhe të lënduarit. Duke folur nga Lviv në Ukrainën perëndimore, zëdhënësi i OBSH-së Bhanu Bhatnagar tha se OBSH deri më tani nuk ka mundur të hyjë në Mariupol dhe nuk e di gjendjen shëndetësore të popullsisë së rrethuar.

Mariupol i është nënshtruar bombardimeve dhe granatimeve të pamëshirshme nga forcat ruse për dy muajt e fundit. Qyteti është rrafshuar me tokë. Dhjetëra mijëra njerëz thuhet se jetojnë në bunkerë nëntokësorë, me ushqim, ujë dhe furnizime mjekësore të kufizuara.

Bhatnagar tha se OBSH po lëviz furnizimet që mendon se nevojiten në Mariupol më afër qytetit. Por ai shtoi se është thelbësore që një kalim i sigurt të krijohet shpejt.

“Ne kemi nevojë për një ndërprerje të luftimeve për të paktën dy ditë në mënyrë që të transferojmë furnizimet jetike, por edhe të vlerësojmë nevojat shëndetësore,” tha ai. “Ne parashikojmë më të keqen. Një sistem shëndetësor që është shembur plotësisht dhe që sjell me vete lloj-lloj efektesh trokitëse. Sigurisht, ka njerëz me lëndime të lidhura me konfliktin që kanë nevojë për ndihmë.”

Bhatnagar vuri në dukje se ka gjithashtu njerëz me kushte kronike dhe nevoja të tjera të kujdesit shëndetësor që nuk kanë akses në mjekësinë jetike. Ai tha se gjetjet e një sondazhi të ri të OBSH-së me 1000 familje në të gjithë Ukrainën tregojnë ndikimin shkatërrues që kjo luftë ka në aksesin në kujdesin shëndetësor.