Qendra Kulturore Shqiptaro-Amerikane “Struga” në Riverdale, Nju Xherzi, organizoi më 9 nëntor 2024 Festivalin e 7-të të Shkollave Shqipe. Ky aktivitet mblodhi shkollat shqipe nga Nju Xherzi dhe Nju Jorku në një festë të kulturës, gjuhës dhe trashëgimisë shqiptare. Aktiviteti u zhvillua nën kujdesin e kryetarit të Qendrës, Sinan Alimi, ndërsa përgatitjet u drejtuan nga përgjegjësi i aktiviteteve, Nafi Sllatina, së bashku me ndihmësen Arta Alimi dhe një ekip i përkushtuar, përfshirë nënkryetarin Jeton Abduramani, përgjegjësen e arsimit Gonxhe Meta dhe koreografin Xhemal Bekteshi. Muzikën e gjallë e solli grupi “X3” me kompozitorin Faton Krasniqi, Fadil Sahatçiu dhe klarinetistin Nehat Curri.

Moderatori i festivalit, gazetari Faton Arifi, përshëndeti pjesëmarrësit dhe vuri në dukje qëllimin e festivalit për të festuar dhe trashëguar traditat shqiptare tek brezat e ardhshëm. Një i ftuar i veçantë ishte z. Fatmir Zajmi, përfaqësues i Konsullatës së Kosovës në Nju Jork, i cili mbajti një fjalë përshëndetëse duke vlerësuar rolin e festivalit për ruajtjen e gjuhës dhe identitetit kulturor shqiptar, si dhe falënderoi organizatorët, prindërit dhe nxënësit për angazhimin e tyre.

Në festival morën pjesë shkollat dhe grupet “Struga” “Rugova” “Mëso Shqip Barbana” “Fëmijët e Shqiponjës” “Skënderbeu” dhe “Nora e Kelmendit” të cilët mblodhën mbi 400 nxënës dhe spektatorë. Ngjarja përfundoi me një atmosferë festive, duke bashkuar komunitetin në një festë në prag të Festave të Nëntorit në Shqipëri.