Presidenti i Ukrainës u ka thënë ministrave të financave të botës, se vendit të tij i duhen 7 miliardë dollarë çdo muaj deri në verë për të vazhduar funksionimin.
Volodymyr Zelensky tha gjithashtu se “do të na duhen qindra miliarda dollarë për të rindërtuar të gjithë këtë më vonë”.
Ai po i drejtohej një konference të Fondit Monetar Ndërkombëtar (FMN) dhe Bankës Botërore nëpërmjet lidhjes video nga Kievi.
Banka Botërore ka vlerësuar se rreth 60 miliardë dollarë dëme fizike i janë shkaktuar Ukrainës deri më tani.
Zelensky tha gjithashtu se komuniteti global duhet të përjashtojë Rusinë menjëherë nga institucionet financiare ndërkombëtare, duke përfshirë Bankën Botërore, FMN-në dhe të tjerët.
Të gjitha vendet “duhet të përgatiten menjëherë për të prishur të gjitha marrëdhëniet me Rusinë”, shtoi ai.
E pyetur nëse FMN-ja do të ishte në gjendje të siguronte fondet e menjëhershme që i nevojiten Ukrainës, drejtoresha menaxhuese e organizatës, Kristalina Georgieva i tha redaktorit të ekonomisë së BBC-së, Faisal Islam: “Ne e gjetëm atë për muajin e parë dhe të dytë.
“Ne besojmë se me kalimin e kohës kjo shumë do të bjerë pasi ekonomia ukrainase në pjesët e vendit që nuk janë nën okupim rritet, dhe ndërsa dërgesat nga ata që tani punojnë diku tjetër fillojnë të rrjedhin.”
Ndërkohë, Sekretarja e Thesarit e SHBA-së, Janet Yellen tha se Rusia duhet të detyrohet të paguajë një pjesë të kostos së rindërtimit të Ukrainës pas luftës.
