Me qindra familje në Kosovë do të ndihmohen edhe këtë vit falë iniciativës tradicionale të Shoqatës ‘PEJA’ në Nju Jork.

Kryetari i Shoqatës, Rejmond Zeka, konfirmoi se për këtë aksion janë mbledhur gjithsej 23,300 dollarë.

“Me kënaqësi ju informojmë dhe për hir të transparencës, se nga iniciativa që patëm, janë mbledhur 23,300 dollarë. Shpërndarja fillon nga dita e premte. Po ashtu, kemi edhe një lajm tjetër të mirë—nga këto mjete do të ndihmohen jo vetëm familjet në Pejë me rrethinë, por edhe në Istog, Deçan dhe Junik. Si çdoherë, shpërndarjen do ta kryejë Shoqata ‘Bereqeti’ dega në Pejë” deklaroi Zeka.

Për bashkatdhetarët pejanë në Nju Jork, solidariteti dhe humanizmi janë kthyer në traditë, duke mbështetur familjet në nevojë për çdo festë kombëtare, fetare dhe globale përmes Shoqatës ‘PEJA’.

Fushata për mbledhjen e fondeve në Nju Jork u zhvillua nga data 10 mars deri më 25 mars.