“Po vuaj mungesën e dikujt që ka qenë gjithmonë i ftuar këtu, Hashim Thaçit. Ai nuk është me ne sot këtu sepse ky vend e tradhtoi. Sepse Joe Biden, që e quajti George Washington-in e Kosovës, e tradhtoi. Sepse edhe pse gjenerali Clark bëri më të mirën, ky vend nuk bëri më të mirën,” tha Rama.
“Jam i sigurt që ky vend mund të kishte bërë më shumë. Së pari duke mos lejuar që kjo farsë të niste,” shtoi ai.
Nofka daton nga vitet kur Thaçi ishte një nga partnerët më të afërt të Uashingtonit në rajon. Gjatë një vizite në Shtëpinë e Bardhë, atëherë zëvendëspresidenti amerikan Joe Biden e kishte cilësuar atë si “George Washington-in e Kosovës”.
Thaçi, i cili udhëhoqi Kosovën drejt shpalljes së pavarësisë në vitin 2008, u shpall fajtor për krime lufte nga Dhomat e Specializuara të Kosovës në fillim të këtij muaji. Në fund të gjyqit, ai u kishte thënë gjyqtarëve se gjithmonë ishte udhëhequr nga idealet perëndimore të demokracisë, barazisë dhe drejtësisë, ndërsa në fund të gushtit deklaroi se priste një pafajësi të plotë.
