Elena Sadiku ka shkruar historinë duke u përfshirë në mesin e pesë finalisteve për çmimin Trajnerja e Vitit në futbollin e femrave në ceremoninë e Topit të Artë 2026.

Trajnerja shqiptare me origjinë nga Kosova, e cila drejton BK Häcken në Suedi, është e vetmja grua në mesin e pesë finalistëve. Për çmimin garojnë edhe Jonatan Giráldez i OL Lyonnes, Andrée Jeglertz i Manchester Cityt, Nils Nielsen i Japonisë dhe Pere Romeu i Barcelonës.

Sadiku ka lindur në Gjermani nga prindër shqiptarë nga Kosova dhe është rritur në Suedi. Ajo ka deklaruar më herët se është shqiptare dhe se dëshiron ta bëjë krenare Kosovën dhe Shqipërinë.

Ajo u bë e njohur në skenën evropiane gjatë periudhës së saj te Celtic. Në janar të vitit 2024 mori drejtimin e skuadrës së femrave të klubit skocez dhe e udhëhoqi drejt titullit të parë në historinë e Celtic në Scottish Women’s Premier League.

Nën drejtimin e saj, Celtic siguroi gjithashtu për herë të parë pjesëmarrjen në fazën e grupeve të Ligës së Kampionëve për femra.

Në fund të vitit 2025, Sadiku u largua nga Celtic dhe mori drejtimin e BK Häcken, kampionëve të Suedisë, me të cilët nënshkroi kontratë trevjeçare.

Dhe suksesi nuk vonoi.

Në maj të vitit 2026, Häcken fitoi edicionin e parë të UEFA Women’s Europa Cup, duke mposhtur Hammarby me rezultat të përgjithshëm 4–2 në finale. Häcken fitoi ndeshjen e parë 1–0 dhe të dytën 3–2, me Felicia Schröder që realizoi het-trik në ndeshjen e kthimit.

Trofeu ishte i pari ndërkombëtar në historinë e BK Häcken dhe e vendosi Sadikun edhe më fuqishëm në mesin e trajnereve të spikatura të futbollit evropian për femra.

Tani, shqiptarja nga Kosova është vetëm një hap larg një tjetër arritjeje historike.

Fituesja e çmimit Trajnerja e Vitit do të shpallet në ceremoninë e Topit të Artë, e cila do të mbahet më 26 tetor në Londër.