Ekspertja shqiptare e sigurisë kibernetike, Esmeralda Kazia, është shpallur “Gruaja e Vitit në Sigurinë Kibernetike 2026”, duke u bërë shqiptarja e parë që merr këtë vlerësim ndërkombëtar.
Kazia u nderua gjatë një ceremonie ndërkombëtare të organizuar nga United Cybersecurity Alliance në Austri, ku morën pjesë profesionistë të sigurisë kibernetike, përfaqësues institucionesh, akademikë dhe ekspertë të teknologjisë nga vende të ndryshme të botës.
Ajo mban pozitën e Drejtoreshës së Teknologjisë për Teknologjitë Operacionale (OT), Sistemet e Kontrollit Industrial (ICS) dhe Automatizimin në Korporatën Elektroenergjetike Shqiptare (KESH), ku angazhohet në mbrojtjen e infrastrukturës kritike energjetike.
Me më shumë se një dekadë përvojë në fushën e sigurisë kibernetike, Kazia ka shërbyer më herët edhe në pozita drejtuese në Autoritetin Kombëtar për Sigurinë Kibernetike të Shqipërisë, duke kontribuar në mbrojtjen e sistemeve digjitale dhe reagimin ndaj incidenteve kibernetike.
Pas marrjes së çmimit, Kazia tha se ky vlerësim përfaqëson një përgjegjësi të madhe për të vazhduar punën në këtë fushë. “Siguria kibernetike nuk ka të bëjë me mbrojtjen e teknologjisë. Ajo ka të bëjë me mbrojtjen e besimit.” – tha ajo në një intervistë.
Ajo shtoi se ky vlerësim e motivon të vazhdojë kontributin në mbrojtjen e infrastrukturës kritike dhe në mbështetjen e brezit të ardhshëm të profesionistëve të sigurisë kibernetike.
Sipas organizatorëve, edicioni i këtij viti mblodhi mbi 5,000 nominime nga e gjithë bota, duke vlerësuar gra të shquara në kategori të ndryshme të sigurisë kibernetike.
