Filmi i shumëpritur The Odyssey i Christopher Nolan do të përfshijë një nga traditat më të veçanta kulturore shqiptare në kolonën zanore.
Kompozitori fitues i Oscarit, Ludwig Göransson, zbuloi se udhëtoi në jug të Shqipërisë për të regjistruar iso-polifoninë shqiptare, një formë e lashtë e këngës shumëzërëshe që do të jetë pjesë e muzikës së filmit. Sipas tij, ishte një traditë muzikore që nuk e kishte dëgjuar më parë në asnjë film.
Gjatë kërkimeve për tinguj autentikë për botën e The Odyssey, Göransson regjistroi edhe fyellin tradicional të barinjve shqiptarë, që përdoret prej brezash. Ai tregoi se regjistrimet duhej të përfundonin para mbrëmjes, pasi barinjtë zgjoheshin herët për t’u kujdesur për bagëtinë.
Në vend të një orkestre klasike hollivudiane, Nolan dhe Göransson zgjodhën instrumente dhe zëra që pasqyrojnë atmosferën e Epokës së Bronzit. Regjistrimet në Shqipëri u bënë pjesë e këtij vizioni, duke ndërthurur tinguj natyrorë dhe tradita të lashta muzikore në kolonën zanore të filmit.
Iso-polifonia shqiptare, e njohur nga UNESCO si Trashëgimi Kulturore Jomateriale e Njerëzimit, është një nga pasuritë më të çmuara të kulturës shqiptare. Përfshirja e saj në një nga prodhimet më të mëdha të Hollywood-it i jep kësaj tradite një skenë globale.
