Pianistja kosovare Ardita Statovci do të mbajë një recital solo më 17 mars në La Maison Française, një nga hapësirat kulturore të njohura në Washington, D.C., duke sjellë para publikut amerikan një program të përzgjedhur nga repertori klasik ndërkombëtar dhe ai kosovar.

Recitali, që fillon në orën 6:30 PM, do të përfshijë vepra nga kompozitorët e njohur botërorë si Franz Schubert, Maurice Ravel dhe Johannes Brahms, si dhe nga kompozitori kosovar Fahri Beqiri. Programi përfaqëson një udhëtim artistik nëpër epoka të ndryshme stilistike, duke bashkuar traditën evropiane me krijimtarinë muzikore nga Kosova.

Në një prononcim për media, vetë pianistja u shpreh se pret me padurim këtë paraqitje të veçantë para publikut në kryeqytetin amerikan. Ajo theksoi se recitalin e ka ndërtuar me kujdes për të reflektuar diversitetin stilistik të repertorit pianistikor, ndërsa një moment i veçantë do të jetë interpretimi i veprës “Allaturka” të kompozitorit Fahri Beqiri.

Statovci bëri të ditur se kjo vepër është interpretuar nga ajo në vende të ndryshme të botës, ndërsa këtë herë do të prezantohet për herë të parë para publikut në Washington D.C., duke sjellë një pjesë të rëndësishme të trashëgimisë muzikore të Kosovës në një nga qendrat më të rëndësishme kulturore dhe diplomatike globale.