Edona Thaqi ka shënuar një arritje historike duke u bërë shqiptarja e parë nga Kosova që angazhohet zyrtarisht si analiste dhe reportere në një rrjet kombëtar amerikan për basketbollin profesional. Ajo i është bashkuar USA Network, ku do të mbulojë dhe analizojë ndeshjet e WNBA, liga elitare e basketbollit për femra në Shtetet e Bashkuara të Amerikës.

Lajmin e ka bërë të ditur vetë Thaqi përmes rrjeteve sociale, ku shprehet e emocionuar për këtë kapitull të ri profesional dhe për mundësinë për të punuar në mbulimin e WNBA dhe basketbollit universitar amerikan. Ky hap e vendos atë në mesin e emrave më të rëndësishëm të analizës sportive në SHBA.

Me prejardhje nga Kosova, Edona Thaqi është ish-basketbolliste dhe ka ndërtuar një karrierë të qëndrueshme në sport dhe media. Pas përfundimit të karrierës si lojtare, ajo u fokusua në gazetarinë dhe analizën sportive, duke kombinuar përvojën në parket me përgatitjen akademike në komunikim sportiv.

Përveç angazhimit në SHBA, Thaqi ka dhënë kontribut edhe në Kosovë, duke sjellë trajnerë të njohur amerikanë dhe duke organizuar kampe trajnimi për të rinjtë, me synimin zhvillimin e basketbollit dhe edukimit sportiv.