Presidentja e Kosovës, Vjosa Osmani, ka nënshkruar dokumentin për themelimin e Bordit të Paqes në një ceremoni të veçantë të udhëhequr nga presidenti amerikan Donald Trump, në kuadër të Forumit Ekonomik Botëror në Davos. Ky veprim e vendos Kosovën në mesin e vendeve themeluese të një organizate të re ndërkombëtare që synon promovimin e paqes, stabilitetit dhe rindërtimit në zonat e konfliktit.

Gjatë ceremonisë, liderët e vendeve pjesëmarrëse nënshkruan dokumentin dy nga dy, me Trumpin në qendër të tavolinës. Vjosa Osmani u thirr për të nënshkruar dokumentin së bashku me kryeministrin e Pakistanit. Para dhe pas nënshkrimit, Osmani dhe Trump u panë duke biseduar shkurt dhe duke shtrënguar duart, një moment që u pa si simbol i afrimit dhe mbështetjes së vazhdueshme amerikane ndaj Kosovës.

Më pas, Trump nënshkroi edhe rezolutën inauguruese që i jep mandat të plotë Bordit të Paqes, i cili fillimisht do të fokusohet në misionin për paqe dhe stabilizim në Gaza, por me synim zgjerimin e rolit edhe në kriza të tjera globale. Me hyrjen në fuqi të kartës themeluese, Bordi i Paqes është tashmë një organizatë zyrtare ndërkombëtare.