Loris Qose, një nxënës nga Cërriku, ka arritur një sukses të jashtëzakonshëm në arenën ndërkombëtare të dijes, duke fituar Medaljen e Artë në Matematikë në Olimpiadën Botërore të Shkencës “Neo Science”, e mbajtur në Orlando, Shtetet e Bashkuara të Amerikës, nga 9 deri më 16 janar 2026.

Në këtë kompeticion prestigjioz, ku morën pjesë nxënës nga shumë vende të botës, Loris Qose u dallua për nivelin e lartë të përgatitjes dhe aftësitë e tij në shkencat ekzakte. Ai u rendit i pari në Matematikë, duke u nderuar me Medalje Ari, ndërsa në disiplinën e Kimisë arriti vendin e tretë, duke fituar Medalje Bronzi.

Sipas organizatorëve, Olimpiada Botërore “Neo Science” synon të testojë dhe promovojë njohuritë e avancuara të nxënësve në fushat kryesore të shkencës përmes provave konkurruese që ndjekin standarde të larta ndërkombëtare. Gara konsiderohet një nga platformat më sfiduese për talentet e reja shkencore në nivel global.

Loris Qose është rritur dhe arsimuar në Shqipëri, dhe suksesi i tij në këtë olimpiadë përbën jo vetëm një arritje personale, por edhe një përfaqësim dinjitoz të arsimit shqiptar në një event shkencor botëror.