Skiatorja shqiptare Lara Colturi ka shkëlqyer sërish, duke siguruar vendin e tretë në garën e Slalomit në Copper Mountain, Kolorado, dhe duke u ngjitur në një tjetër podium të rëndësishëm të Kupës së Botës. Pas një lëshimi të parë shumë të fortë, ku u rendit e katërta, 18-vjeçarja realizoi një paraqitje edhe më të mirë në lëshimin e dytë, duke përfunduar pas kampiones amerikane Mikaela Shiffrin dhe gjermanes Lena Dürr.

Ministri i Turizmit, Kulturës dhe Sportit, Blendi Gonxhja, e vlerësoi performancën e Colturit, duke theksuar se ajo “e mbylli në mënyrën më të mirë të mundshme garën e saj të dytë në këtë etapë të Kupës së Botës”. Ai shtoi se ky rezultat i jep asaj mundësinë të forcojë vendin e dytë në renditjen e përgjithshme të Kupës së Botës, një sukses historik për skitarinë shqiptare.

Duke komentuar arritjen e saj, Colturi u shpreh e emocionuar: “Është çmenduri, as unë nuk po e besoj dot. Jam krenare për veten dhe për punën që kemi bërë me ekipin. Po përparojmë të gjithë së bashku.”