Dredhza Braina, 22-vjeçarja nga Kosova, është përzgjedhur në listën e ngushtë për çmimin prestigjioz Cybersecurity Woman of the Year 2025 në Shtetet e Bashkuara të Amerikës — një vlerësim global që nderon gratë më të shquara në fushën e sigurisë kibernetike.

Përfshirja e saj në mesin e finalisteve përfaqëson një arritje të madhe personale, por edhe një moment krenarie për Kosovën në arenën ndërkombëtare të teknologjisë.

Pak muaj më parë, Dredhza ishte pjesëmarrëse në konferencën BSidesChicago në Chicago, Illinois, ku prezantoi për herë të parë veglën e saj me burim të hapur CAPICHE Detection Framework. Kjo vegël i shërben komunitetit të sigurisë kibernetike, duke e bërë më të lehtë detektimin e kërcënimeve në Cloud APIs – një sfidë gjithnjë në rritje në këtë fushë.

“Nder dhe kënaqësi të jem pjesë e këtyre eventeve, ndër të vetmet përfaqësuese të kombit tim, e sidomos si më e reja në moshë për nga prezentuesit, e rrethuar me profesionistë të njohur të fushës nga e mbarë bota,” shkroi ajo në Facebook.