Kapitenia Hatixhe Çollaku, gruaja e parë shqiptaro-amerikane që ka komanduar Kompaninë e vetme të Inteligjencës Ushtarake të Gardës Kombëtare të Nju Xhersit, është nderuar me Medaljen për Shërbim të Meritueshëm—një nga dekoratat më të larta në Ushtrinë e SHBA-së.

Kjo medalje iu dha për lidershipin dhe shërbimin e jashtëzakonshëm gjatë komandimit të Kompanisë Delta të Batalionit të Inxhinierisë 104-të, në kuadër të Brigadës së 44-të të Këmbësorisë, nga shtatori i vitit 2021 deri në tetor të vitit 2023. Gjatë kësaj kohe, Kapitenia Çollaku u dallua si një oficere shembullore, e vlerësuar për fuqizimin e ushtarëve të saj dhe për përkushtimin në avancimin e misionit të njësisë.

E lindur në Shqipëri, Çollaku emigroi në SHBA në moshë të vogël dhe prej atëherë ka thyer barriera njëra pas tjetrës. Emërimi i saj historik si gruaja e parë në krye të kësaj njësie elitare ishte një moment historik për gratë në uniformë dhe për komunitetin shqiptaro-amerikan.

Ajo më parë ka ndarë historinë e saj edhe me Ambasadën e SHBA-së në Shqipëri, ku ka folur për rrugëtimin e saj, shërbimin në ushtri dhe krenarinë për origjinën e saj shqiptare.