Elisabeth Grezda jeton në Shqipëri prej më shumë se 20 vitesh. Ajo ka ndërtuar familje, ka mësuar gjuhën dhe ka përvetësuar shumë nga traditat shqiptare. Por pavarësisht gjithçkaje, ajo pranon: “Kam kuptuar se nuk do të bëhem kurrë shqiptare.”

E ftuar në emisionin Aldo Morning Show në TV Klan, Elisabeth, e lindur pranë Albany, New York, tregoi historinë e saj: si e njohu bashkëshortin shqiptar, Nikun, gjatë studimeve në SHBA. E rritur në Nepal, ajo thotë se për Shqipërinë kishte lexuar vetëm në revista si Time dhe Newsweek, të cilat ia sillte i ati.

E mahnitur nga inteligjenca e Nikut dhe mënyra si ishte përshtatur me kulturën amerikane, Elisabeth vendosi ta ndërtonte jetën me të. Pas katër vitesh lidhje, ata u martuan – fillimisht takuan prindërit e saj në Tajlandë, më pas bënë dasmë në New York dhe një tjetër në Shqipëri, sipas traditës.

Sot ata kanë tre fëmijë. Elisabeth ka mësuar të gatuajë ushqime tradicionale dhe e vlerëson mënyrën si shqiptarët komunikojnë hapur dhe me humor. Megjithatë, ndjen se është ende e huaj.

“Është më e lehtë që një shqiptar të bëhet amerikan sesa një amerikane të bëhet shqiptare,” tha ajo. “Amerika është një përzierje kulturash – mund të bëhesh amerikan për 6 muaj. Shqiptarët mësojnë gjuhën si vendasit. Por unë, edhe pas 20 vitesh, ende ndihem si mysafire në Shqipëri.”