Kandidati Republikan është parashikuar të fitojë çelësat e Shtëpisë së Bardhë për mandatin e tij të dytë pasi ka siguruar fitore në tre shtete kryesore të lëkundura, përfshirë Pensilvaninë.

Donald Trump shpalli fitoren e tij në zgjedhjet presidenciale të SHBA-së të mërkurën në mëngjes, menjëherë pasi rezultatet e pjesshme treguan se ai kishte fituar tre shtete të rëndësishme të lëkundura.

“Kjo ka qenë lëvizja më e madhe politike e të gjitha kohërave” tha Trump në fjalimin e tij të fitores në selinë e fushatës në Florida, ndërkohë që rezultatet zyrtare të zgjedhjeve ende nuk ishin konfirmuar.

“Kjo është një fitore madhështore për popullin amerikan, që do të na lejojë ta bëjmë Amerikën të madhe përsëri” shtoi ai, duke përdorur sloganin e fushatës së tij.

Trump e cilësoi mandatin e tij të dytë si një “epokë e artë” për Amerikën dhe popullin e saj, ndërkohë që turma brohoriste “USA, USA.”

Ai tha se partia e tij do të ndihmonte vendin të “shërohej” dhe premtoi të rregullonte kufijtë e Amerikës, duke thënë se ai dhe Partia Republikane kishin “bërë histori” për një arsye.

“Amerika na ka dhënë një mandat të pashembullt dhe të fuqishëm” deklaroi ai, duke theksuar se republikanët kishin “marrë përsëri kontrollin” e Senatit.

Republikanët fituan përsëri Senatin e SHBA-së për herë të parë në katër vjet, duke u dhënë atyre një qendër të rëndësishme pushteti në Uashington dhe një rol udhëheqës në miratimin e kabinetit të ardhshëm, si dhe përbërjen e Gjykatës Supreme nëse ka ndonjë vend vakant.

Gjithashtu, ai shtoi se Zoti i kishte “shpëtuar jetën për një arsye” duke iu referuar një atentati ndaj tij gjatë një tubimi në Pensilvani në korrik.