Presidenti i Shteteve të Bashkuara, Joe Biden, sërish ka rezultuar pozitiv për COVID-19, tha më 30 korrik mjeku i Shtëpisë së Bardhë.
Sipas deklaratës, presidenti Biden nuk ka asnjë simptomë dhe ndihet “shumë mirë”.
Biden, i cili rezultoi pozitiv për sëmundjen COVID-19 nëntë ditë më parë, por më pas rezultoi negativ dy herë gjatë kësaj jave, do të rikthehet në izolim, tha mjeku i Shtëpisë së Bardhë, Kevin O’Connor. Ai shtoi se ky ishte një rast i rrallë i rikthimit të virusit, pasi presidenti u shërua nga sëmundja duke iu nënshtruar një terapie me ilaçe anti-virale.
Biden shkroi në Twitter se rastet e riinfektimit janë të rralla.
“Nuk kam asnjë simptomë dhe do të izolohem për hir të sigurisë të të gjithë personave përreth meje. Unë ende jam duke punuar dhe do t’i rikthehem terrenit shumë shpejt”, tha ai.
O’Connor tha se Biden, i cili është 79 vjeç, në katër ditët e fundit ka rezultuar negativ. Ai shtoi se nuk ka plane që presidenti t’i nënshtrohet trajtimit mjekësor sikurse më parë, pasi ai nuk ka simptome.
Biden e ka përshkruar përvojën e tij të mëhershme me COVID-19 si të lehtë, duke thënë se ishte në gjendje të punonte nga izolimi. Ai ka argumentuar se kjo ishte falë vaksinave që ka marrë dhe trajtimeve të tjera.
